Moitas das formas de mirar o mundo aprendémolas, sen decatarnos, ao longo da nosa vida. A través da educación, da familia, das amizades, dos medios de comunicación ou das redes sociais imos incorporando ideas, crenzas e estereotipos que condicionan a maneira na que entendemos a realidade e nos relacionamos coas demais persoas.

 

Pero tamén podemos aprender a mirar doutro xeito.

​

Lentes Violetas é un proxecto socioeducativo desenvolvido por Aventeira S. Coop. Galega e subvencionado pola Deputación da Coruña, que naceu no ano 2022 co propósito de promover unha mirada máis consciente, crítica e comprometida coa igualdade.

​

As "Lentes Violetas" son unha metáfora: representan un conxunto de ferramentas, recursos e aprendizaxes que nos axudan a identificar as desigualdades de xénero, cuestionar estereotipos, detectar as diferentes formas de violencia machista e promover relacións baseadas no respecto, a corresponsabilidade, os coidados e o bo trato.

​

Desde o seu inicio, o proxecto foi medrando e incorporando novas liñas de actuación dirixidas a entidades sociais, educativas e culturais. A través de formacións, materiais didácticos, asesoramento, recursos pedagóxicos e espazos de participación, buscamos acompañar ás persoas e organizacións na construción de contornas máis igualitarias e libres de violencias machistas.

​

Porque poñerse as Lentes Violetas significa aprender a mirar a realidade con outros ollos. E cando cambia a nosa mirada, tamén cambia a forma na que educamos, participamos e transformamos o mundo.